क्लब हिमालयन टाइगर गौरादहको चौथो वार्षिक साधारणसभा सम्पन्न
गौरादह, झापा। क्लब हिमालयन टाइगर गौरादहको चौथो वार्षिक साधारणसभा शनिबार गौरादहस्थित लायन्स चिल्ड्रेन पार्क मा सम्पन्न भएको छ। साधारणसभामा गौरादह नगरपालिकाकी उपप्रमुख जलपर्षा राजवंशी प्रमुख अतिथिका रूपमा सहभागी हुनुहुन्थ्यो। कार्यक्रममा क्लबका केन्द्रीय अध्यक्ष रेवत चन्द्र भण्डारी , गौरादह–२ का वडाध्यक्ष गोपाल कोइराला , गौरादह–१ का वडाध्यक्ष नगेन्द्र भण्डारी , स्कुलचौन उच्च माध्यमिक विद्यालय का पूर्वप्रधानाध्यापक बाबुराम भण्डारी लगायत विभिन्न सामाजिक, शैक्षिक तथा राजनीतिक क्षेत्रका व्यक्तित्वहरूको उपस्थिति रहेको थियो। कार्यक्रममा क्लबले स्थापनाकालदेखि सञ्चालन गर्दै आएका सामाजिक सेवा, युवा सशक्तीकरण, खेलकुद, वातावरण संरक्षण तथा सामुदायिक विकाससँग सम्बन्धित गतिविधिहरूको समीक्षा गरिएको थियो। साथै आगामी वर्षका लागि संस्थागत विकास, सामाजिक उत्तरदायित्व र जनसेवामूलक कार्यक्रमलाई अझ प्रभावकारी रूपमा अघि बढाउने प्रतिबद्धता व्यक्त गरिएको थियो। वक्ताहरूले क्लब हिमालयन टाइगरले समाजमा पुर्याउँदै आएको योगदानको प्रशंसा गर्दै आगामी दिनमा पनि शिक्षा, स्वास्थ्य, खेलकुद, वातावरण संरक्षण तथा सामाजिक सेवाका क्षेत्रमा अझ सक्रिय भूमिका निर्वाह गर्न शुभकामना व्यक्त गरेका थिए। साधारणसभामा क्लबका पदाधिकारी, सदस्य, शुभेच्छुक तथा स्थानीयवासीहरूको उल्लेखनीय सहभागिता रहेको थियो।
सरकारका प्रवक्ता भन्छन्– दुई दिनको बिदाबारे पुनर्विचार हुँदैन
काठमाडौं । शिक्षामन्त्री सस्मित पोखरेलले सातामा दुई दिन बिदा दिन सरकारको निर्णयमा पुनर्विचार नहुने बताएका छन्। आज मन्त्रालयमा पत्रकारहरूसँग कुरा गर्दै दुई दिनको बिदा कायमै रहने बताए। सरकारका प्रवक्ता समेत रहेका पोखरेलले भने, ‘शैक्षिक संस्था र सरकारी कार्यालयमा सातामा दुई दिनका लागि दिइएको बिदाको पूर्ण उपयोग गर्न आग्रह गरेका छौँ। उक्त निर्णयमा कुनै पुनर्विचार हुँदैन।’ उनले शैक्षिक परामर्श व्यवसायीका लागि निर्धारण गरिएको २५ लाख धरौटीको व्यवस्थाबाट सरकार पछि नहट्ने समेत प्रस्ट पारे। तीन प्रतिशत समता शिक्षा शुल्कमा सरकार पछि हटेपनि धरौटीको व्यवस्थाबाट सरकार ब्याक नहुने उनको भनाइ छ। विद्यालय शिक्षा ऐनजस्ता कानुन निर्माण गर्दा भने सरोकार भएका पक्षसँग पूर्वपरामर्श गरिने समेत बताए। विश्वविद्यालयलाई स्वायत्त र दलीय प्रभावमुक्त बनाउन नवनियुक्त उपकुलपतिहरूलाई आफ्नो सोच पत्रसहित अघि बढ्न आग्रह गरेको समेत जानकारी गराए।
निर्वाचन क्षेत्रमा भेटघाटको क्रममा रास्वपा सांसद लडेर घाइते
गुल्मी क्षेत्र नं २ मा राष्ट्रिय स्वतन्त्र पार्टीबाट प्रतिनिधिसभा सदस्य गोविन्द पन्थी लडेर घाइते भएका छन् । उनी आफ्नै निर्वाचन क्षेत्र धुर्कोटमा भेटघाटको क्रममा लडेर सामान्य घाइते हुन् । राष्ट्रिय स्वतन्त्र पार्टी धुर्कोटका सभापति राजेन्द्र पोख्रेलका अनुसार उनी धुर्कोट आधारभूत अस्पतालमा उपचार तथा निरीक्षणपछि नियमित भेटघाटमै रहेका छन् ।
कीर्तिपुरमा कारभित्र जलेर एक पुरुषको मृत्यु, आत्महत्याको आशंकामा अनुसन्धान
काठमाडौंको कीर्तिपुर नगरपालिका–१ ट्याङ्लाफाँटमा मंगलबार बिहान एउटा कारमा आगलागी हुँदा कारभित्र रहेका एक पुरुषको जलेर मृत्यु भएको छ। बा ५ च ३०३८ नम्बरको कारमा एक्कासी आगो लागेको देखेपछि स्थानीयवासी घटनास्थलमा पुगेका थिए। कारभित्र एक व्यक्ति देखिएपछि ढोका खोल्ने प्रयास गरिए पनि सफल हुन सकेन। त्यसलगत्तै प्रहरी टोली घटनास्थल पुगेको थियो। जिल्ला प्रहरी परिसर काठमाडौंका एसपी पवनकुमार भट्टराईका अनुसार प्रहरी पुग्दासम्म चालक बस्ने सिटमा सिटबेल्ट लगाएको अवस्थामा कारभित्रै एक पुरुष जलेर मृत्यु भएको अवस्थामा फेला परेका थिए। मृतकको पहिचान सुरेश चन्द श्रेष्ठ का रूपमा भएको प्रहरीले जनाएको छ। उनी उक्त कारका चालक तथा धनीसमेत रहेको खुल्न आएको छ। प्रारम्भिक अनुसन्धानका क्रममा कार नबिल बैंकबाट ऋण लिएर खरिद गरिएको पनि खुलेको प्रहरीले जनाएको छ। प्रहरीका अनुसार कारमा आगो लाग्दासमेत चालक बाहिर ननिस्किएको तथा एकैपटक सम्पूर्ण कारमा आगो फैलिने सम्भावना कम हुने भएकाले घटना भवितव्यभन्दा पनि आफैं सिर्जित हुन सक्ने कोणबाट अनुसन्धान अघि बढाइएको छ। एक अनुसन्धान अधिकृतका अनुसार आगो लाग्न थालेपछि बाहिर निस्कने समय सामान्यतया हुने भएकाले आत्महत्याको उद्देश्य हुन सक्ने आशंकासमेत गरिएको छ। यद्यपि, घटनाको वास्तविक कारण भने अनुसन्धान र पोस्टमार्टम प्रतिवेदनपछि मात्रै पुष्टि हुने प्रहरीले जनाएको छ। मृतकको शव पोस्टमार्टमका लागि त्रिभुवन विश्वविद्यालय शिक्षण अस्पताल, महाराजगञ्ज पठाइएको छ। घटनाबारे थप अनुसन्धान जारी रहेको जिल्ला प्रहरी परिसर काठमाडौंले जनाएको छ।
कोशीमा सत्ताको घिनलाग्दो खेल, एमाले बाहेकको बहुमत पुर्याउनु ‘भ्यागुताको धार्नी’जस्तो
कर्णाली, सुदूरपश्चिम र बागमती प्रदेशमा विकसित हुँदै गरेको नयाँ राजनीतिक समीकरणको बाछिटा कोशी प्रदेशमा पनि परिरहेकै छ । एमाले नेतृत्वको कोशी सरकारबाट नेपाली कांग्रेस बाहिरिने भनिए पनि सो पार्टीले आधिकारिक निर्णय लिन भने सकेको छैन । यद्यपि प्रदेश सभाका प्रमुख दल नेपाली कांग्रेस, नेकपा एमाले र नेपाली कम्युनिस्ट पार्टीले भने आन्तरिक छलफललाई तीव्रता दिएका छन् । कांग्रेसले केन्द्रसँग छलफलका लागि कोशी प्रदेश सभा संसदीय दलका नेता तथा प्रदेश सभापति उद्धव थापा र केन्द्रीय सदस्य अमृत अर्याललाई जिम्मेवारी दिइसकेको छ । उता, एमालेका सचिवसमेत रहेका मुख्यमन्त्री हिक्मतकुमार कार्की केही दिनदेखि राजधानी काठमाडौँमै केन्द्रित भएका छन् । प्रमुख सचेतक रमेशकुमार बस्नेतसहित कार्कीले काठमाडौँमा एमाले अध्यक्ष केपी शर्मा ओलीसँग कुराकानी गरिरहेको स्रोतको दाबी छ । नेकपा एमाले कोशी प्रदेश संसदीय दलका प्रमुख सचेतक रमेशकुमार बस्नेतले पार्टीको केन्द्रीय नेतृत्वलाई कोशी प्रदेशको गम्भीर अवस्थाबारे सचेत गराएको बताए । पार्टी अध्यक्ष केपी शर्मा ओलीसहित सहभागी आइतबारको संसदीय विभागको बैठकमा बस्नेतले कोशीको वस्तुस्थितिबारे ब्रिफिङ गरेका थिए । ‘हाम्रो विभागले सात वटै प्रदेशका साथीहरूसँग कुराकानी गरेको थियो । मैले विगतदेखि अहिलेसम्म कोशी प्रदेशमा ५ पटक मुख्यमन्त्री परिवर्तन भएको, सभामुख समेत सरकार फेरबदलमा सहभागी हुनुभएको जस्ता अलि अनौठो अभ्यासको कुरा राखेँ,’ बस्नेतले भने, ‘अहिले कोशी प्रदेश सभामा भएको अङ्कगणितको कुरा पनि राखेँ ।’ यदि बुद्धिमत्तापूर्वक काम भएन भने मध्यावधिमा जान सक्ने विषयमा आफूले सचेत गराएको उनको भनाइ छ । अहिले सरकार गिराउने र बनाउने खेलमा लाग्ने समय नभएको भन्दै उनले बुद्धिमतापूर्वक काम नगरे मध्यावधिमा जानुपर्ने अवस्थाबारे ब्रिफिङ गरेको उनले बताए । ‘अलिकति पनि कहीँ चुक्यौँ भने मध्यावधिमा जान सक्छ । त्यसले गर्दा सावधानीपूर्वक कार्य गर्नुपर्छ भन्ने कुरा हो,’ उनले भने । तर, उक्त बैठकमा वामपन्थी एकता वा सहकार्यका विषयमा पार्टी अध्यक्ष ओलीबाट कुनै पनि निर्देशन नआएको बस्नेतले बताए । ‘त्यस्तो केही पाएको छैन, अहिले त्यसरी ठ्याक्कै यो पार्टीसँगै जाने भन्ने कुरा पनि छैन,’ उनले भने । केही दिन अगाडिको अन्तरवार्ताको क्रममा मुख्यमन्त्री हिक्मतकुमार कार्कीले केन्द्रको निर्देशनका कारण कांग्रेस सरकारबाट बाहिरिने अवस्था आए पनि आफू विधि र प्रक्रियाबाट मात्र अघि बढ्ने अडानमा रहेको बताएका थिए । ‘कांग्रेससित यहाँ प्रदेशमा हाम्रो कुनै असमझदारी, असहमति हैन । सकेसम्म मिलेर जाऔँ,’ कार्कीले भनेका थिए । उता, नेपाली कम्युनिस्ट पार्टीका नेता पनि कांग्रेस–एमालेमा आएको खटपटलाई अवसरको रूपमा लिँदै काठमाडौँमा केन्द्रित भएका छन् । नेकपाका संसदीय दलका नेता इन्द्रबहादुर आङ्बो सोमबार नै काठमाडौँ गएका छन् । उनले भने, ‘पछिल्लो राजनीतिको विषयमा नेताहरुसँग कुराकानी हुन्छ । त्यसअवसरमा प्रवेशको बारेमा पनि कुरा हुन्छ ।’ कांग्रेस संसदीय दलका नेतासमेत रहेको प्रदेश सभापति उद्धव थापा र कांग्रेसका केन्द्रीय सदस्य अमृत अर्यालले काठमाडौँ जाने क्रमलाई बाक्लो बनाएका थिए । तर, अहिले वामपन्थी मिल्ने अवस्था देखिएपछि कांग्रेस नेताहरूले धेरै चासो नराखेको बताइन्छ । कांग्रेसका प्रमुख सचेतक गोपाल तामाङले दुई–तीन दिन केही नहुने बताए । ‘अहिले केही विकसित भएको छैन, म झापामै छु । दलको नेताज्यू पनि प्रदेशमै हुनुहुन्छ । बीपी जयन्ती ६ गते छ । त्यो कार्यक्रम सकिएपछि मात्रै नयाँ कुरा होला,’ तामाङले भने । उता, कांग्रेस कोशी प्रदेशका महामन्त्री भुपेन्द्र राईले आफू काठमाडौँमै रहेको भए पनि प्रदेश सरकारबारे कुराकानी नभएको बताए । ‘बीपी जयन्तीको दिन कार्यक्रम छ । त्यसपछि मात्रै केही होला,’ उनले भने । नयाँ राजनीतिक परिस्थितिमा कोशी प्रदेशमा वामपन्थी गठबन्धनको सरकार बन्ने सम्भावना बढेको केही नेता बताउँछन् । ‘कांग्रेस र एमालेको सरकार फेल भयो भने अब बनाउने भनेको नेकपाको नेतृत्वमा हो । त्यसका लागि वामपन्थी सहकार्य आवश्यक छ,’ नेकपाका ती नेताले भने, ‘तर, माधवकुमार नेपालको नेतृत्वमा विगतमा रहेको नेकपा एकीकृत समाजवादीका साथीहरूलाई केही अप्ठ्यारो लाग्ने गरेको छ । त्यसलाई छलफलबाट टुङ्ग्याउनु पर्छ ।’ नेकपाका ती नेताले हालसम्म गण्डकी, कोशी र मधेसमा आफ्नो पार्टीले मुख्यमन्त्री नपाएको बताए । ‘गण्डकी, कोशी र मधेसमा हामीले अहिलेसम्म सरकार बनाएको छैन । अनि अहिलेसम्म नबनाएको हिसाबले गण्डकीमा र मधेसमा नेकपाको नेतृत्वमा सरकार बन्ने सम्भावना छैन । त्यसो हुँदा हामीले बल गर्नुपर्ने कोशीमै हो ।’ वामपन्थी मिल्दा कोशीमा सहज कोशी प्रदेशको कुल ९२ सदस्यीय प्रदेश सभामा बहुमतका लागि कम्तीमा ४७ सांसद आवश्यक छ । नेकपा एमाले र नेकपा गठबन्धन बन्दा कोशी प्रदेशमा सहज बहुमत हुन्छ । कोशीमा हाल कायम सांसद संख्या ९२ छ, जसमा एमालेको ४० र नेकपाको १७ गरी ५७ सांसद छन् । यो समीकरण अन्तर्गत यहाँ स्पष्ट र बलियो बहुमतको सरकार बन्ने देखिन्छ । उता, एमाले बाहेकको समीकरणमा बहुमत पुगे पनि त्यो दिगो हुने सम्भावना कमजोर छ । प्रदेश सभामा कांग्रेसका २९ र नेकपा १७ गरी ४६ जना हुन्छ । यो गठबन्धनलाई बहुमतका लागि थप १ सिट आवश्यक पर्छ । यसका लागि १ सिट भएको जसपा वा सभामुखसहित ५ सिट भएको राप्रपाको समर्थन आवश्यक छ । राप्रपाले अहिले सत्ताको जोडघटाउमा सहभागी नहुने बताएसँगै यहाँ एमाले बाहेकको बहुमत पुर्याउनु ‘भ्यागुताको धार्नी’जस्तो भएको छ ।
बौद्धमा श्रीमान्सँगको विवादपछि आत्मदाह प्रयास, ५० प्रतिशत शरीर जल्यो
काठमाडौँको बौद्ध गेट नजिकै श्रीमान्सँगको विवादपछि एक महिलाले आफ्नै शरीरमा पेट्रोल छर्केर आत्मदाहको प्रयास गरेकी छन्। काभ्रेपलाञ्चोकको तेमाल गाउँपालिका–३ घर भई हाल गोकर्णेश्वर नगरपालिका–८ माकलबारी बस्दै आएकी २७ वर्षीया सालु गुरुङले सोमबार दिउँसो करिब २:५० बजे शरीरमा आगो लगाएकी हुन्। जिल्ला प्रहरी परिसर काठमाडौँका अनुसार श्रीमान्-श्रीमतीले संयुक्त रूपमा सञ्चालन गर्दै आएको खाजा घर पछाडिको पार्किङ क्षेत्रमा उनले शरीरमा पेट्रोल खन्याएर आगो लगाएकी थिइन्। घटनालगत्तै उनका श्रीमान्ले आगो निभाएर तत्काल उपचारका लागि साँखुस्थित सुष्मा कोइराला मेमोरियल अस्पताल पुर्याएका थिए। प्रहरीका अनुसार आगोले महिलाको अनुहार, छाती र दुवै हात गरी करिब ५० प्रतिशत भाग जलेको छ। साँखुमा प्रारम्भिक उपचारपछि उनलाई थप उपचारका लागि कीर्तिपुर अस्पताल रिफर गरिएको छ। काठमाडौँ परिसरका सूचना अधिकारी एवं प्रहरी उपरीक्षक (एसपी) पवनकुमार भट्टराईका अनुसार घाइते महिलाको अवस्था हाल सामान्य बोल्न सक्ने रहेको छ। घटनाको मुख्य कारण र अन्य विषयमा थप अनुसन्धान भइरहेको प्रहरीले जनाएको छ।
झापाको बनियानी बजारबाट चारजना जुवाडे पक्राउ
झापाको कचनकवल गाउँपालिका वडा नं. ६ बनियानी बजारबाट चारजना जुवाडे पक्राउ परेका छन् । गएराति ११ बजेतिर बनियानी बजारस्थित लक्ष्मी मावि अगाडी नरसिंह माझीले संचालन गरेको किराना पसलमा जुवा तास खेलिरहेको अबस्थामा जुवाडे पक्राउ परेका हुन् । पक्राउ पर्नेहरुमा कचनकवल वडा नं.६ बस्ने ३० वर्षीय नरसिंह माझी , सोही ठाउँ बस्ने ३८ वर्षीय तोपलाल राजवंशी,४२ वर्षीय मेघनाथ दाहाल र ४० वर्षीय तुलसी यादव रहेका छन् । तासको खालबाट तास र नगद ४६ हजार ९७० रुपैयाँ बरामद भएको छ । गोप्य सूचनाको आधारमा इलाका प्रहरी कार्यालय बनियानीबाट प्रहरी टोली खटिएर नियन्त्रणमा लिएको होे । नियन्त्रणमा लिने क्रममा दुई जनामध्ये एक जनाको नाम थर वतन थाहा नभएको पुरुष र अर्का महेन्द्र ठाकुर भन्ने मानिस फरार भएकाले खोजतलास भइरहेको प्रहरीले जनाएको छ ।
कोशी प्रदेशका केही स्थानमा भारी वर्षाको सम्भावना, सतर्कता अपनाउन आग्रह
कोशी प्रदेशका पहाडी तथा तराई भूभागका एक–दुई स्थानमा आज चट्याङ्गसहित भारी वर्षाको सम्भावना रहेको छ। मौसम पूर्वानुमान महाशाखाका अनुसार हाल देशभर मनसुनी वायुको प्रभाव रहेकाले कोशी प्रदेशका विभिन्न क्षेत्रमा वर्षाको प्रक्षेपण गरिएको हो। आज दिउँसो कोशी प्रदेशका तराईका केही स्थानमा चट्याङ्गसहित मध्यम वर्षा हुनेछ भने पहाडी भूभागका एक–दुई स्थानमा भारी वर्षाको सम्भावना छ। हाल कोशीको तराई क्षेत्रमा आंशिक बदली रहे पनि केही स्थानमा मध्यम वर्षा भइरहेको छ। यसैगरी रातिको समयमा पनि कोशी प्रदेशका पहाडी र तराई भूभागका एक–दुई स्थानमा भारी वर्षा हुन सक्ने महाशाखाले जनाएको छ। कोशीका हिमाली क्षेत्रमा समेत चट्याङ्गसहित वर्षाको सम्भावना देखिएको छ। देशभरकै मौसमको अवस्था हेर्दा हाल मनसुनको न्यून चापीय रेखा सरदर स्थानमा अवस्थित छ। कोशीका अतिरिक्त बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी भूभागमा पनि भारी वर्षाको सम्भावना रहेको छ। वर्षाका कारण पहाडी भूभागमा पहिरो तथा नदीमा जलस्तर बढ्न सक्ने जोखिम रहेकाले महाशाखाले आवश्यक सतर्कता अपनाउन अनुरोध समेत गरेको छ।
करिब १५ लाखको सामान बरामद गरेर भन्सार बुझाइयो
सशस्त्र प्रहरी बलले मोरङका विभिन्न नाकाबाट भन्सार छली गरी नेपाल भित्र्याइएका करिब १५ लाख रुपैयाँ बराबरका सामान र सवारी साधन बरामद गर्दै आवश्यक कारबाहीका लागि विराटनगर भन्सार कार्यालयमा बुझाएको छ । सामान बरामद गर्ने क्रममा सशस्त्रले एक जनालाई पक्राउसमेत गरेको छ । सशस्त्र प्रहरी बल नेपाल नम्बर ३ गण मुख्यालय कंकालिनी मोरङबाट खटिएको टोलीले भारतबाट अवैध रूपमा भन्सार छली गरी सिटी सफारीमा लोड गरेर ल्याउँदै गरेको करिब ३ लाख ५० हजार रुपैयाँ बराबरको लत्ताकपडा बरामद गरेको हो । सोही टोलीले बिल–बीजकबिनै कुरियरमार्फत पठाउन तयारी अवस्थामा रहेको करिब ५ लाख ८० हजार २८० रुपैयाँ बराबरका विभिन्न किसिमका लत्ताकपडा तथा कस्मेटिक सामग्री पनि नियन्त्रणमा लिएको छ । त्यसैगरी, सशस्त्र प्रहरी बल नेपाल सीमा सुरक्षा गुल्म रानीबाट खटिएको ड्युटी टोलीले विभिन्न स्थानमा चेकजाँचका क्रममा भन्सार छली गरी ल्याइएका ५ लाख ५२ हजार ४६० रुपैयाँ बराबरका औषधि, स्कुटर, सिटी सफारी तथा कागती बरामद गरेको छ । सिटी सफारी तथा स्कुटरसहित बरामद गरिएका १४ लाख ८६ हजार ४८० रुपैयाँ बराबरका सामान तथा पक्राउ परेका व्यक्तिलाई आवश्यक कारबाहीका लागि विराटनगर भन्सार कार्यालयमा बुझाइएको सशस्त्र प्रहरी बल मोरङका प्रमुख एसपी गेहेन्द्रबहादुर भण्डारीले बताए । उनले सीमावर्ती क्षेत्रमा भन्सार छली तथा अवैध आयात–निर्यात नियन्त्रणका लागि निगरानी बढाएर चेकजाँचलाई कडा बनाइएको बताए । ‘सीमा क्षेत्रमा कडाइ गरिएको छ । चोरी तस्करी नियन्त्रणका लागि सबै निकायसँग समन्वय भइरहेको छ,’ एसपी भण्डारीले भने ।
