News collection

राजनीति

592 articlesUpdated २२ असोज २०८३

Latest stories

Most recent first

मंसिर पहिलो हप्ता राष्ट्रिय भेला गर्ने एमालेको निर्णय

काठमाडौं । नेकपा एमाले मंसिर पहिलो हप्ता राष्ट्रिय भेला गर्ने निर्णय गरेको छ। आज बसेको स्थायी कमिटी बैठकले भेला गर्ने निर्णय गरिएको उपमहासचिव लेखराज भट्टले बताए। उनका अनुसार भेलामा पार्टीका प्रदेश पदाधिकारी, जिल्ला पदाधिकारी, पालिकाका अध्यक्ष, उपाध्यक्ष र जनप्रतिनिधिसहित सङ्घ, प्रदेश, पालिकाका जनप्रतिनिधि उपस्थित हुनेछन्। मंसिर २६ गते वडा र पुस ४ गते पालिका अधिवेशन गर्ने निर्णय भएको पनि बताए। नगर र वडा अधिवेशनपछि प्रदेशस्तरीय भेला गर्ने निर्णय भएको बताए। खाली रहेका १३ वटा जिल्लामा अध्यक्षको स्थानीय कमिटीले नै निर्माण गरेर माथिल्लो कमिटीलाई अनुमोदन गराई कार्यान्वयनमा लैजाने निर्णय भएको पनि बताए। बैठक भोलि १ बजे फेरि पुनः बताए।

राजनीति 3 min read

नेपाली कांग्रेस दमकको सभापतिमा सुनिल राई सर्वसम्मत, १० वटै वडामा नयाँ नेतृत्व

दमक । नेपाली कांग्रेस दमक नगर समितिको सभापतिमा सुनिल राई सर्वसम्मत चयन हुनुभएको छ। दमक उद्योग वाणिज्य संघको सभाहलमा सम्पन्न कांग्रेसको नियमित महाधिवेशन पक्षधरको भेलाले राईको नेतृत्वमा नयाँ नगर कार्यसमिति चयन गरेको हो। नयाँ नेतृत्व चयनसँगै कांग्रेस दमकमा पुस्तान्तरणको स्पष्ट संकेत देखिएको छ। नगरदेखि वडा तहसम्म अनुभवी नेतासँगै युवा पुस्तालाई समेत नेतृत्वमा समेटिएपछि पार्टीलाई नयाँ ऊर्जा र गतिका साथ अघि बढाउने अपेक्षा गरिएको छ। सर्वसम्मत चयन भएको नगर कार्यसमितिको उपसभापतिमा अमित खड्का र सान्ता अधिकारी, सचिवमा सन्दिप राई तथा सहसचिवमा अनिश बस्नेत र सुवास राई चयन हुनुभएको छ। त्यस्तै नगर सदस्यमा छितिज ढुंगाना, राम किसन साह, दिपक तिरुवा, सर्वज्ञ कन्दङ्वा, साजन राई, दुर्गा धिमाल, आसा राई, मानदेव राई, नेपबहादुर दर्जी, रोजिना गुरुङ र अन्जना चौहान नेपाल चयन हुनुभएको छ। नगर नेतृत्वसँगै दमकका १० वटै वडामा पनि सभापति चयन गरिएको छ। वडा नम्बर १ मा पासाङ तामाङ, वडा नम्बर २ मा दिप मगर, वडा नम्बर ३ मा केदारसिंह अधिकारी, वडा नम्बर ४ मा भीमराज कार्की र वडा नम्बर ५ मा ऋद्धि बद्री खड्का सभापतिमा चयन हुनुभएको छ। त्यसैगरी वडा नम्बर ६ मा नारायणप्रसाद भट्टराई, वडा नम्बर ७ मा राजेश रनपहेली, वडा नम्बर ८ मा राजन राई, वडा नम्बर ९ मा साजन राई र वडा नम्बर १० मा यामबहादुर विष्ट सभापतिमा चयन हुनुभएको छ। १० वटै वडामा नेतृत्व चयन भएसँगै कांग्रेस दमकको संगठन अब वडा तहबाटै थप सक्रिय हुने अपेक्षा गरिएको छ। स्थानीय तहमा पार्टीको संगठन बलियो बनाउने, कार्यकर्तालाई चलायमान बनाउने र जनतासँगको सम्बन्ध अझ मजबुत बनाउने जिम्मेवारी नयाँ नेतृत्वमाथि आएको छ। नयाँ नेतृत्व चयनका क्रममा अनुभवी नेता र युवा पुस्ताको बलियो उपस्थिति देखिएको थियो। भेलामा पूर्व सांसद महिन्द्र कुमारी लिम्बु, डा. खगेन्द्र पाण्डव अधिकारी, घनेन्द्र योङ्या, दिलबहादुर बुढाथोकी, वीरेन्द्र पोख्रेल, लता चापागाईं, गोमा बुढाथोकी, राजेन्द्र प्रसाई, राजु न्यौपाने र जङ्गबहादुर थापा लगायतका अनुभवी नेताहरूको सहभागिता थियो। त्यस्तै युवा नेताहरू द्रोण दाहाल, सुनिल हताचो, विशाल अधिकारी र रोवर्ट रनपहेली लगायतको पनि सक्रिय सहभागिता रहेको थियो। स्ववियु सदस्यहरू सर्वज्ञ कन्दङ्वा, सुदिप साम्बाहाम्फे र सुमितकुमार तामाङ लगायत युवा विद्यार्थी नेताहरूको उपस्थितिले पनि कांग्रेसमा नयाँ पुस्ताको आकर्षण र सक्रियता बढ्दै गएको संकेत गरेको सहभागीहरूको भनाइ छ। पार्टीभित्र लामो समयदेखि सक्रिय अनुभवी नेतृत्वको अनुभव र नयाँ पुस्ताको ऊर्जा तथा प्रविधिमैत्री सोचलाई संयोजन गरेर अघि बढ्न सके संगठन थप बलियो बन्ने अपेक्षा गरिएको छ। पछिल्लो समय राजनीतिक दलहरूमा पुस्तान्तरण र युवाको नेतृत्व सहभागिता मुख्य बहसको विषय बनिरहेका बेला दमक कांग्रेसले नगरदेखि वडा तहसम्म युवालाई नेतृत्वमा ल्याउन गरेको प्रयासलाई महत्वपूर्ण रूपमा हेरिएको छ। अर्कोतर्फ, नगर तथा वडा तहमा नेतृत्व चयन गर्दा सर्वसम्मतिलाई प्राथमिकता दिइनुले पार्टीभित्रको आन्तरिक एकता र सहकार्यको सन्देशसमेत दिएको छ। प्रतिस्पर्धाका माध्यमबाट नेतृत्व चयन गर्नुपर्ने अवस्थामा पनि आपसी समझदारी र सहमतिका आधारमा नेतृत्व टुंग्याउनुलाई सहभागीहरूले सकारात्मक रूपमा लिएका छन्। अब नयाँ नेतृत्वसामु पार्टी संगठनलाई थप व्यवस्थित बनाउने, निष्क्रिय कार्यकर्तालाई सक्रिय बनाउने, युवा पुस्तालाई पार्टीसँग जोड्ने र स्थानीय जनताका समस्या तथा सरोकारका विषयलाई प्रभावकारी रूपमा उठाउने चुनौती छ। नवनिर्वाचित नगर तथा वडा समितिका पदाधिकारी र सदस्यहरूलाई भेलामा उपस्थित अतिथि तथा कांग्रेसका नेताहरूले बधाई तथा सफल कार्यकालको शुभकामना व्यक्त गरेका छन्। नगरदेखि वडासम्म सर्वसम्मत नेतृत्व चयनसँगै कांग्रेस दमकले नयाँ राजनीतिक यात्राको सुरुवात गरेको छ। अनुभवी नेतृत्वको अनुभव र युवा पुस्ताको ऊर्जालाई एकसाथ अघि बढाउँदै नयाँ नेतृत्वले संगठनलाई कति प्रभावकारी बनाउँछ, त्यो भने आगामी दिनमा देखिनेछ।

राजनीति 1 min read

राप्रपा कोशी प्रदेश अध्यक्षमा पुनः रामकुमार थापा निर्वाचित

दमक, २१ असोज । राष्ट्रिय प्रजातन्त्र पार्टी (राप्रपा) कोशी प्रदेशको अध्यक्षमा रामकुमार थापा पुनः निर्वाचित भएका छन्। दमकमा सम्पन्न पार्टीको दोस्रो प्रदेश अधिवेशनबाट थापा अध्यक्ष पदमा दोहोरिएका हुन्। अध्यक्ष पदका लागि थापासहित दुर्गा बस्नेत र विश्वमोहन चुनावी प्रतिस्पर्धामा थिए। निर्वाचनमा थापाले २ सय ७० मत प्राप्त गर्दै अध्यक्षमा निर्वाचित भए। उनका निकटतम प्रतिस्पर्धी दुर्गा बस्नेतले २ सय ३१ मत प्राप्त गरे। थापाले बस्नेतलाई ३९ मतले पछि पार्दै विजयी भएका हुन्। अर्का प्रतिस्पर्धी विश्वमोहनले भने ४१ मत प्राप्त गरे। दमकस्थित कस्मिक पार्टी प्यालेसमा बुधबार सम्पन्न अधिवेशनमा कुल ६ सय ४७ प्रतिनिधि सहभागी भएका थिए। तीमध्ये ५ सय ४४ जनाले मतदान गरेका थिए। मतदानका क्रममा ६ मत बदर भएको थियो। अध्यक्ष पदको निर्वाचनमा तीन उम्मेदवारबीच प्रतिस्पर्धा भएकाले परिणामलाई राप्रपा कोशीको प्रदेश नेतृत्वका लागि महत्वपूर्ण रूपमा हेरिएको छ। पुनः अध्यक्षमा निर्वाचित भएसँगै थापाले कोशी प्रदेशमा राप्रपाको संगठनलाई थप सुदृढ बनाउने जिम्मेवारी पाएका छन्। दमकमा भएको अधिवेशनले प्रदेश नेतृत्वसँगै पार्टीभित्रको आगामी राजनीतिक रणनीति र संगठन विस्तारका विषयमा पनि चासो बढाएको छ।

राजनीति 1 min read

झापा–५ मा कांग्रेस संस्थापनलाई इतर पक्षको धक्का

दमक । नेपाली कांग्रेसको आन्तरिक शक्ति संघर्षमा संस्थापन पक्षले कमजोर आँकलन गरेको ‘इतर पक्ष’ झापा क्षेत्र नं. ५ मा अप्रत्याशित र आक्रामक रूपमा उदाएको छ। दमक नगरपालिकाका १० वटै वडामा सम्पन्न वडा अधिवेशनको परिणामले संस्थापन पक्षको प्रारम्भिक रणनीतिलाई पूर्ण रूपमा उल्टाइदिएको छ। तल्लो तहबाटै आक्रामक रणनीति अख्तियार गर्दै अधिकांश वडामा युवा अनुहारलाई अघि सारेपछि वडा तहमा संस्थापन इतर पक्ष निकै मजबुत र निर्णायक देखिएको छ। सम्पन्न अधिवेशनमार्फत दमकका १० वटै वडामा अनुभवी नेताहरूसँगै पुस्तान्तरणको स्पष्ट प्रभावसहित युवा नेतृत्व स्थापित भएको छ। वडा नं. १ मा पासाङ तामाङ, २ मा दिप मगर, ३ मा केदारसिंह अधिकारी, ४ मा भीमराज कार्की र ५ मा ऋद्धि बद्री खड्का निर्वाचित भएका छन्। त्यसैगरी वडा नं. ६ मा नारायणप्रसाद भट्टराई, ७ मा राजेश रनपहेली, ८ मा राजन राई, ९ मा साजन राई र १० मा यामबहादुर विष्टले वडाको नेतृत्व सम्हालेका छन्। क्षेत्र नं. ५ मा महिन्द्र कुमार लिम्बु, घनेन्द्र योङ्या, दिल बहादुर बुढाथोकी, डा. खगेन्द्र पाण्डव, विरेन्द्र पोख्रेल, लता चापागाई, गोमा बुढाथोकी, राजेन्द्र प्रसाई, राजु न्यौपाने र जङ्ग बहादुर थापाजस्ता अनुभवी नेताहरूको उपस्थिति छ। यसैगरी, युवा नेता तथा अग्रज पत्रकार विष्णु सुब्बाको बौद्धिक र साङ्गठनिक सक्रियताले यस क्षेत्रको राजनीतिलाई थप अर्थपूर्ण बनाएको छ। अर्कातर्फ युवा नेता द्रोण दाहाल, सुनिल हताचो, विशाल अधिकारी, रोवर्ट रणपहेली तथा स्ववियु सदस्यहरू सर्वज्ञ कन्दाङ्वा, सुदिप साम्बाहाम्फे र सुमित कुमार तामाङसम्मको अग्रसरताले मैदान थप तातेको छ। वडा अधिवेशनको यो बलियो जगसँगै अब सिंगो पार्टी पंक्तिको ध्यान आगामी नेतृत्व चयनतर्फ केन्द्रित भएको छ। दमक नगर अधिवेशन भोलि (असोज २२ गते) हुँदैछ भने क्षेत्रीय अधिवेशन असोज २४ गतेका लागि तय गरिएको छ। तल्लो तहमै इतर पक्षको आक्रामक उभारले संस्थापन पक्षलाई ठूलो रक्षात्मक दबाबमा पर्ने बुझाई छ ।

राजनीति 1 min read

कांग्रेसको निर्देशन– १८ वर्ष नपुगेकालाई पार्टी सदस्य नबनाउनू

काठमाडौं । नेपाली कांग्रेसले १८ वर्ष उमेर नपुगेकालाई पार्टी सदस्य नबनाउन निर्देशन दिएको छ। केन्द्रीय निर्वाचन समितिका सदस्य सचिव राजु कटुवालले विज्ञप्ति जारी गर्दै पार्टीको विधान अनुसार सदस्य बन्नको लागि १८ वर्ष उमेर पूरा भएको हुनुपर्ने व्यवस्था रहेको जानकारी गराएका छन्। १५ औँ महाधिवेशनका क्रममा इलामको माइजोगमाई गाउँपालिका ५ को वडा अधिवेशन मार्फत क्षेत्रीय प्रतिनिधि चुनिएका इलामका सुजल चापागाईँ १७ वर्ष पूरा गरी १८ वर्ष पुग्न केही महिना बाँकी रहेको विवरण प्राप्त भएकाले उनको निर्वाचित क्षेत्रीय प्रतिनिधिको जिम्मेवारी स्थगन गरिएको समेत विज्ञप्तिमा उल्लेख छ। विज्ञप्तिमा भनिएको छ, ‘आगामी ०८३ माघ १८ गते निजको उमेर १८ वर्ष पुरा हुने नागरिकता विवरण अनुरूप तत्पश्चात् मात्रै निजले चाहँदा पार्टी सदस्यता कायम हुने स्पष्ट गरिन्छ ।’ अन्य कुनै जिल्लाका पनि वडा तहमा भएका निर्वाचनहरूमा यस्तै प्रकृतिका उम्मेदवार निर्वाचित भएको पाइएमा कार्यान्वयन नगर्न निर्देशन दिएको छ।

राजनीति 1 min read

कांग्रेस महाधिवेशन : ५८ जिल्लाका ५१२ पालिकामा अधिवेशन सकियाे, भारी वर्षाका कारण सतर्क रहन निर्देशन

नेपाली कांग्रेसको १५औँ केन्द्रीय महाधिवेशनअन्तर्गत देशभर पालिका अधिवेशन प्रक्रिया उत्साहप्रद रूपमा अघि बढिरहेको निर्वाचन समितिले जनाएको छ । महाधिवेशन निर्वाचन समितिका सदस्य सचिव राजु कटुवालका अनुसार ७ असोजसम्म ५८ जिल्लाका ५१२ पालिकामा उद्घाटन तथा बन्द सत्रसहित निर्वाचन प्रक्रिया अघि बढेको छ । निर्वाचन समितिका अनुसार बाँकी २४१ पालिकामा भने ८ र ९असोजमा पनि अधिवेशन प्रक्रिया जारी रहनेछ । नेपाली कांग्रेस केन्द्रीय कार्यसमितिको निर्णयअनुसार १६ देखि १९ असोजसम्म १५औँ केन्द्रीय महाधिवेशन आयोजना हुँदैछ । सोही महाधिवेशनअन्तर्गत निर्वाचन कार्यतालिकाअनुसार अहिले देशभरका स्थानीय तहमा अधिवेशन भइरहेको हो । यसैबीच, मौसम प्रतिकूल हुनसक्ने भन्दै निर्वाचन समितिले अधिवेशन सञ्चालनका क्रममा विशेष सतर्कता अपनाउन सम्बन्धित निर्वाचन अधिकृतहरूलाई निर्देशन दिएको छ । जल तथा मौसम विभागबाट प्राप्त जानकारीअनुसार ८ देखि १२ असोजसम्म भारी वर्षा हुने पूर्वानुमान रहेकाले पालिका, प्रदेश सभा तथा प्रतिनिधिसभा क्षेत्रका अधिवेशन सञ्चालन गर्दा मौसमको अवस्थालाई ध्यानमा राख्न समितिले आग्रह गरेको हो ।

राजनीति 1 min read

कांग्रेसका ४३ जिल्लाका ३ हजार ३ सय ९६ वडामा अधिवेशन सम्पन्न

नेपाली कांग्रेसको १५औँ महाधिवेशनअन्तर्गत ४३ जिल्लाका ३ हजार ३ सय ९६ वडामा वडा अधिवेशन सम्पन्न भएको छ । कांग्रेस केन्द्रीय निर्वाचन समितिका सदस्यसचिव राजु कटुवालले शनिबार साँझ विज्ञप्ति जारी गर्दै ४३ जिल्लाका उक्त वडामा अधिवेशन सम्पन्न भएको जानकारी दिएका हुन् । समितिका अनुसार असोज ३ गते ताप्लेजुङ, पाँचथर, संखुवासभा, धनकुटा, सोलुखुम्बु, उदयपुर, झापा, मोरङ, महोत्तरी, रामेछाप, काभ्रेपलाञ्चोक, सिन्धुपाल्चोक, चितवन, भक्तपुर, ललितपुर, काठमाडौं र गोरखालगायत जिल्लाका वडामा अधिवेशन सम्पन्न भएको छ । यस्तै कास्की, मनाङ, पर्वत, स्याङ्जा, बागलुङ, नवलपुर, पाल्पा, अर्घाखाँची, गुल्मी, रुकुम पूर्व, रोल्पा, प्युठान, रुकुम पश्चिम, डोल्पा, जुम्ला, मुगु, हुम्ला, जाजरकोट, दैलेख, सुर्खेत, डोटी, अछाम, दार्चुला, बैतडी, कञ्चनपुर र कैलालीका वडामा पनि अधिवेशन सम्पन्न भएको निर्वाचन समितिले जनाएको छ । वडा अधिवेशनबाट वडा कार्यसमिति र क्षेत्रीय प्रतिनिधि चयन भएका छन् । निर्वाचन समितिका सदस्यसचिव कटुवालका अनुसार रसुवा, नुवाकोट र धादिङबाहेक अन्य जिल्लामा असोज ४ गते पनि वडा अधिवेशन जारी रहनेछ । कांग्रेसको १५औँ केन्द्रीय महाधिवेशन भने असोज १६ देखि १९ गतेसम्म काठमाडौंमा हुने तय भएको छ ।

राजनीति 1 min read

डडेल्धुरामा कांग्रेस अधिवेशन विवाद चर्कियो, पूर्वसभापति मल्लद्वारा बहिष्कारको घोषणा

डडेल्धुरामा नेपाली कांग्रेसको जिल्ला अधिवेशनलाई लिएर पार्टीभित्र विवाद चर्किएको छ । जिल्ला सभापति भीमबहादुर साउदले अधिवेशनको प्रक्रिया अघि बढाएपछि नेताहरूबीच मतभेद सतहमा आएको हो । अधिवेशनको प्रक्रियाको विरोधमा जिल्ला उपसभापति डिल्लीराज जोशीले शनिबार छलफल बोलाएका थिए । छलफलमा अर्का उपसभापति लक्ष्मी अवस्थी, सचिव शेरबहादुर भण्डारी, प्रदेशसभा सदस्य सरस्वती खड्का, जिल्ला समन्वय समिति प्रमुख गगन भण्डारीलगायत नेताहरू सहभागी भएका थिए । छलफलले यथास्थितिमा अधिवेशनमा सहभागी नहुने र पार्टीभित्र एकता कायम गर्न पहल गर्ने निर्णय गरेको जनाइएको छ । यता जिल्ला सभापति साउदसहित गोविन्द बोहरा र रघुबर भट्टलगायत नेताहरू भने अधिवेशनको प्रक्रिया अघि बढाउने पक्षमा छन् । उनीहरूले वडा अधिवेशन गर्ने तयारी गरेका छन् । यसैबीच, डडेल्धुराका पूर्वसभापति तथा पूर्वप्रदेशसभा सदस्य कर्णबहादुर मल्लले पनि अधिवेशन बहिष्कार गर्ने घोषणा गरेका छन् । उनले अधिकांश नेताहरू यथास्थितिमा अधिवेशनको पक्षमा नरहेको दाबी गर्दै एकलौटी रूपमा प्रक्रिया अघि बढाइएको आरोप लगाएका छन् । मल्लले पार्टीभित्र विभाजन र विवाद रहेको अवस्थामा अधिवेशन अघि बढाउँदा कांग्रेस झनै कमजोर बन्ने बताएका छन् । जिल्ला, स्थानीय तह तथा अधिकांश वडा कार्यसमितिले समेत अधिवेशन स्थगित गर्न माग गरिरहेको उनको दाबी छ । उनले तत्काल अधिवेशन सम्पन्न गर्नुभन्दा पार्टी एकता जोगाउन नेतृत्वले पहल गर्नुपर्ने बताएका छन् । साथै, पूर्वसभापति शेरबहादुर देउवासहित सबै पक्षको सहभागितामा अधिवेशन गर्ने वातावरण बनाउन दबाब सिर्जना गर्नुपर्ने उनको भनाइ छ । मल्लले आफू पार्टी विभाजनको पक्षमा नरहेको स्पष्ट पार्दै कांग्रेसलाई एकताबद्ध बनाउन नेता–कार्यकर्तालाई दृढतापूर्वक उभिन आग्रह गरेका छन् ।

राजनीति 1 min read

गृहमन्त्री सुधन गुरुङले नागरिकसँग प्रत्यक्ष संवाद गर्ने

राष्ट्रिय स्वतन्त्र पार्टी (रास्वपा)ले यही भदौ महिनादेखि सञ्चालन गरेको ‘नागरिक, नीति र नेतृत्व’ कार्यक्रममा गृहमन्त्री सुधन गुरुङ उपस्थित हुने भएका छन् । रास्वपाले केन्द्रीय कार्यालयमा सोमबार साँझ हुने कार्यक्रममा गृहमन्त्री गुरुङलाई उपस्थित गराउन लागेको हो । उनले कार्यक्रममा उपस्थित भएर नागरिकसँग प्रत्यक्ष संवाद गर्नेछन् । कार्यक्रम दुई चरणमा सञ्चालन हुनेछ । पहिलो चरणमा आम नागरिकले आफ्ना गुनासा, समस्या, सुझाव तथा अपेक्षा प्रत्यक्ष रूपमा गृहमन्त्रीसमक्ष राख्न सक्नेछन् भने दोस्रो चरणमा मन्त्री, सांसद तथा केन्द्रीय नेतृत्वबीच नागरिकबाट प्राप्त सुझावसँगै समसामयिक तथा नीतिगत विषयमा छलफल गरिनेछ । नागरिकका आवाज, सुझाव र अपेक्षालाई सरकार तथा पार्टीको नीति निर्माण र प्रभावकारी कार्यान्वयनसँग प्रत्यक्ष रूपमा जोड्ने उद्देश्यले यो कार्यक्रम सञ्चालन गरिएको रास्वपाले जनाएको छ ।

Loading more articles...