काठमाडौँ । पाकिस्तान को अशान्त दक्षिणपश्चिमी प्रान्त बलुचिस्तान मा सैनिक कर्मचारी तथा उनीहरूका परिवार बोकेको रेललाई लक्षित गरी आइतबार गरिएको शक्तिशाली विस्फोटमा कम्तीमा २४ जनाको मृत्यु भएको छ।
अधिकारीहरूका अनुसार घटनामा ५० भन्दा बढी व्यक्ति घाइते भएका छन्। विस्फोट प्रान्तीय राजधानी क्वेटा नजिक भएको हो। घटनापछि रेलका केही डिब्बा पल्टिएका तथा पूर्ण रूपमा क्षतिग्रस्त भएका छन्।
सार्वजनिक भएका तस्बिरहरूमा उद्धारकर्मी तथा स्थानीयवासी भग्नावशेषमा फसेकाहरूको खोजी तथा उद्धारमा जुटिरहेको देखिएको छ। घाइते तथा मृतकलाई स्ट्रेचरमार्फत सुरक्षित स्थानमा सारिएको छ भने सुरक्षा बलले घटनास्थललाई कडा सुरक्षा घेरामा राखेको छ।
प्रहरीका अनुसार क्वेटाबाट पेशावर तर्फ गइरहेको रेल चमन क्षेत्र नजिक पुगेका बेला विस्फोटक पदार्थ बोकेको एउटा सवारीसाधन रेलसँग ठोक्किँदा ठूलो विस्फोट भएको थियो। विस्फोटका कारण रेलका झ्याल फुट्नुका साथै नजिकका डिब्बाहरूमा गम्भीर क्षति पुगेको बताइएको छ।
एएफपीलाई उद्धृत गर्दै एक अधिकारीले रेलमा सवार सैनिकहरू आगामी मङ्गलबारदेखि सुरु हुने ईद बिदा मनाउन परिवारसहित यात्रा गरिरहेको बताएका छन्।
बलुचिस्तान क्षेत्रफलका हिसाबले पाकिस्तानकै सबैभन्दा ठूलो प्रान्त भए पनि विकासका सूचकमा पछाडि परेको क्षेत्र मानिन्छ। यहाँ सक्रिय बलुच पृथकतावादी समूहहरूले केन्द्र सरकारले स्थानीय जनतालाई लाभ नदिई प्राकृतिक ग्यास तथा खनिज स्रोतको दोहन गरेको आरोप लगाउँदै आएका छन्। त्यसकै कारण प्रान्तमा लामो समयदेखि सुरक्षा चुनौती कायम छ।
