काठमाडौँ । संविधान संशोधन बहसपत्र तयार गर्ने कार्यदलको बैठक सिंहदरबारमा जारी छ। बैठक प्रधानमन्त्री बालेन्द्र साहका राजनीतिक सल्लाहकार तथा कार्यदलका संयोजक असिम साहको अध्यक्षतामा बसिरहेको हो।
बैठकमा उठेका विषयहरू तथा विभिन्न राजनीतिक दलहरूको लिखित धारणा सङ्कलन गरी संविधान संशोधनका मुद्दा पहिचान गर्ने र कार्यदलको आगामी कार्ययोजना तयार गर्ने विषयमा छलफल भइरहेको छ। संयोजक साहका अनुसार कार्यदलले संविधान संशोधनसम्बन्धी विषयलाई व्यापक रूपमा अघि बढाउने लक्ष्य राखेको छ।
उनले संविधान संशोधन प्रक्रिया राष्ट्रिय सहमति, सहभागिता र तथ्यमा आधारित हुने बताएका छन्। नेपालको संविधानको धारा २७४ ले संशोधनसम्बन्धी स्पष्ट व्यवस्था गरेको उल्लेख गर्दै उनले सार्वभौमिकता, भौगोलिक अखण्डता, स्वाधीनता तथा जनतामा निहित सार्वभौमसत्ताको प्रतिकूल हुने गरी संविधान संशोधन गर्न नसकिने प्रावधान रहेको स्पष्ट पारे।
निर्वाचन प्रणाली, प्रत्यक्ष निर्वाचित कार्यकारी, पूर्ण समानुपातिक प्रतिनिधित्व, सांसद मन्त्री नहुने व्यवस्था, गैरदलीय स्थानीय सरकार तथा प्रदेश संरचनाको सुधारजस्ता विषयमा व्यापक छलफल गरी अघि बढ्ने उनको भनाइ छ।
