ललितपुर। ललितपुर जिल्ला अदालतले सेवाग्राहीको सुविधा सुनिश्चित गर्न खाजा खाने समयमा पनि नियमित सेवा प्रवाह गर्ने निर्णय गरेको छ।
अदालतको प्रशासन शाखाले जारी गरेको सूचना अनुसार, चैत १७ गतेदेखि लागू हुने गरी अदालतमा दिउँसोको खाजा समयमा समेत कामकारबाही रोक्न नहुने व्यवस्था मिलाइएको छ।
अघिल्लो व्यवस्था अनुसार, आइतबारदेखि बिहीबार दिउँसो १:३० बजेदेखि २:३० बजेसम्म र शुक्रबार १:०० बजेदेखि २:०० बजेसम्म खाजा समय तय थियो। उक्त समयमा अदालतबाट प्रदान गरिने सेवाहरू रोकिने हुँदा सेवाग्राहीले लामो समय कुर्नुपर्ने समस्या देखिन्थ्यो।
नयाँ व्यवस्था अनुसार, खाजा समयमा पनि अदालतको सेवा रोकिँदैन, जसले सेवाग्राहीलाई अनावश्यक पर्खाइ र झन्झटबाट राहत मिल्ने अपेक्षा गरिएको छ।
अदालतले यस कदमबाट सर्वसाधारणलाई समय बचत, सहज पहुँच र सेवा प्रक्रियामा निरन्तरता मिल्ने विश्वास व्यक्त गरेको छ।
