तेहरान । इरानको संसदीय समितिले स्ट्रेट अफ हर्मुजमार्ग भएर आउने जाने जहाजमाथि शुल्क (टोल) लगाउने योजना स्वीकृत गरेको छ। इस्लामिक रिभोलुशनरी गार्ड कर्प्स (आईआरजीसी)सँग सम्बन्धित फार्स न्यूज एजेन्सीले यो जानकारी सार्वजनिक गरेको हो।
सूचनाअनुसार, अमेरिका र इजरायलका जहाजहरूलाई सो स्ट्रेट हुँदै आवागमन गर्न प्रतिबन्ध लगाइने निर्णय गरिएको छ। साथै, इरानविरुद्धको प्रतिबन्धमा सहभागी अन्य देशका जहाजहरूलाई पनि रोक लगाउने योजना रहेको राष्ट्रिय सुरक्षा आयोगका एक सदस्यले बताए।
एएफपीका अनुसार, नयाँ शुल्क प्रणाली इरानी सरकारी टेलिभिजनमार्फत घोषणा गरिएको छ र यसलाई ओमानसँग सहकार्य गर्दै लागू गरिनेछ। स्ट्रेट अफ हर्मुज विश्व बजारमा पुग्ने करिब २० प्रतिशत कच्चा तेलको प्रमुख मार्ग हो। तर, पछिल्लो युद्ध सुरु भएयता जहाजहरूको आवागमनमा ठूलो कमी आएको छ। समुद्री तथ्याङ्क विश्लेषक कम्पनी केप्लरका अनुसार हाल आवागमन करिब ९५ प्रतिशतले घटेको छ।
विशेषज्ञहरूले यस कदमलाई अन्तर्राष्ट्रिय तेल आपूर्ति र समुद्री सुरक्षा दुवैमा महत्वपूर्ण असर पार्ने चेतावनी दिएका छन्। इरानको टोल प्रणाली लागू भएपछि कच्चा तेलको ढुवानी लागत बढ्ने र विश्व बजारमा मूल्य अस्थिरता आउने सम्भावना रहेको बताइएको छ। साथै, अमेरिका र इजरायलले यस कदमलाई कडा प्रतिकार गर्ने सम्भावना रहँदा, क्षेत्रीय तनाव थप बढ्ने जोखिम पनि विश्लेषकहरूले औँल्याएका छन्।
यस निर्णयले अन्तर्राष्ट्रिय व्यापारिक जहाजहरूका लागि नयाँ चुनौती सिर्जना गर्ने, तेल आपूर्ति शृंखला प्रभावित गर्ने र स्ट्रेट अफ हर्मुजको रणनीतिक महत्त्व पुनः प्रकाशमा ल्याउने अपेक्षा गरिएको छ।