विद्युत् ट्रिपिङ र अवरोधको समय घट्यो: प्राधिकरणको तथ्याङ्क

नेपाल विद्युत् प्राधिकरणका अनुसार आर्थिक वर्ष ०८२/०८३ मा विद्युत् ट्रिपिङको संख्या र रोकावटको समय गत वर्षको तुलनामा उल्लेख्य घटेको छ। सातवटै प्रदेश र केन्द्रमा हरेक महिनामा विद्युत् जाने समस्या कम भएको तथ्याङ्क देखिएको छ। प्राधिकरणका कार्यकारी निर्देशक हितेन्द्रदेव शाक्यका अनुसार प्रसारण र वितरण लाइन, सबस्टेसन सुधार, प्राविधिक समस्या देखिएका ठाउँमा तत्काल सुधार, दक्ष जनशक्तिको तालिम र मर्मतसम्भारका कारण ट्रिपिङ कम भएको हो। तथ्याङ्कअनुसार साउनमा १२९ पल्ट घटेर ११५, भदौ १२८ बाट ११५, असोज ११२ बाट ९८, कात्तिक ७१ बाट ५९, मंसिर ६८ बाट ३२, पुस ५९ बाट ५०, माघ ५४ बाट ४४ र फागुन ६६ बाट ४७ पटक ट्रिपिङ भएको छ भने रोकावटको समय पनि समानुपातिक घटेको देखिन्छ। प्राधिकरणले ट्रिपिङ बढी हुने सबस्टेसनको पहिचान गरी सुधार, लोड व्यवस्थापन र प्राविधिक सुधारमा निरन्तर काम गरिरहेको छ र उपभोक्तालाई गुणस्तरीय, भरपर्दो र पर्याप्त विद्युत् उपलब्ध गराउन विभिन्न प्रणालीगत सुधार र व्यवस्थापनको प्रयास जारी राखेको छ।