काठमाडाैँ । पश्चिम एसियामा जारी युद्धबिच कुटनीतिक प्रयासले गति लिएको सङ्केत दिँदै इरानले अमेरिकाबाट १५ बुँदे युद्धविराम प्रस्ताव प्राप्त गरेको दाबी पाकिस्तानी अधिकारीहरूले गरेका छन्। यद्यपि तेहरानले औपचारिक रूपमा यस्तो वार्तामा संलग्न नरहेको अडान दोहोर्याउँदै आएको छ।
बुधबार दुई पाकिस्तानी अधिकारीले नाम सार्वजनिक नगर्ने सर्तमा जानकारी दिँदै उक्त प्रस्ताव इरानसम्म पुगेको बताएका हुन्। उनीहरूले भने, प्रस्तावमा युद्ध अन्त्यतर्फ उन्मुख विभिन्न महत्त्वपूर्ण पक्षहरू समेटिएका छन्, जसले क्षेत्रीय तनाव कम गर्ने उद्देश्य राखेको देखिन्छ।
प्रस्तावका मुख्य बुँदाहरूमा इरानमाथि लगाइएका प्रतिबन्धहरू क्रमशः हटाउने, नागरिक प्रयोजनका लागि आणविक ऊर्जा क्षेत्रमा सहयोग गर्ने तथा इरानको विवादास्पद आणविक कार्यक्रमलाई सीमित वा फिर्ता गर्ने विषय समावेश गरिएको जनाइएको छ। साथै, अन्तर्राष्ट्रिय आणविक ऊर्जा एजेन्सीमार्फत अनुगमन गर्ने व्यवस्था, मिसाइल क्षमतामा सीमा निर्धारण गर्ने र पर्सियन खाडीको संवेदनशील जलमार्ग स्ट्रेट अफ होर्मुज हुँदै सुरक्षित ढुवानी सुनिश्चित गर्ने विषय पनि प्रस्तावमा राखिएको अधिकारीहरूले बताए।
अधिकारीहरूले विस्तृत विवरण सार्वजनिक गर्न आफूहरू अधिकृत नभएको उल्लेख गर्दै, प्रस्तावको समग्र स्वरूप व्यापक कूटनीतिक प्याकेजको रूपमा रहेको सङ्केत गरेका छन्।
तर, इरानले अमेरिकासँग प्रत्यक्ष वार्तामा संलग्न नरहेको स्पष्ट पार्दै आएको छ। बुधबार एक सैन्य प्रवक्ताले अमेरिकी कुटनीतिक प्रयासप्रति व्यङ्ग्यात्मक प्रतिक्रिया जनाउँदै तेहरान आफ्नो अडानमा दृढ रहेको संकेत गरेका छन्।
यस घटनाक्रमले एकातर्फ शान्ति प्रयास अघि बढिरहेको सङ्केत गरे पनि अर्कोतर्फ दुवै पक्षबीचको अविश्वास अझै कायम रहेको देखाउँछ, जसले प्रस्तावको भविष्य अनिश्चित नै बनाएको छ।
