विराटनगर, ११ चैत — विराटनगर महानगरपालिका–१७ मा कल्भर्टमुनि तन्नाले बेरिएको अवस्थामा फेला परेको महिलाको शवको पहिचान खुलेको छ। मृतक विराटनगर–१५ निवासी कोमलकुमारी साह रहेको प्रहरीले जनाएको छ।
मंगलबार साँझ स्थानीयले कल्भर्टमुनि शंकास्पद वस्तु देखेपछि वडाध्यक्ष समीर कमर मियाँमार्फत प्रहरीलाई खबर गरेका थिए। त्यसपछि घटनास्थलमा पुगेको प्रहरीले तन्नामा बेरिएको अवस्थामा महिलाको शव फेला पारेको हो।
जिल्ला प्रहरी कार्यालय मोरङका अनुसार कोमलकुमारीका श्रीमान् रोशन साहले चैत ८ गते श्रीमती हराएको भन्दै इलाका प्रहरी कार्यालय रानीमा निवेदन दिएका थिए। तर अनुसन्धानका क्रममा शवको हुलिया र हराएकी महिलाको विवरण मिलेपछि प्रहरीले रोशनलाई नियन्त्रणमा लिएको छ।
प्रहरी स्रोतका अनुसार प्रारम्भिक अनुसन्धानमा रोशनले घरायसी विवादका कारण श्रीमतीको घाँटी थिचेर हत्या गरेको र प्रमाण लुकाउन शवलाई पोको पारेर करिब ५ किलोमिटर टाढा रहेको कल्भर्टमुनि फालेको देखिएको छ।
कोमलकुमारी चैत ६ गतेदेखि घरबाट हराएकी थिइन्।
शव सडेको र दुर्गन्धित अवस्थामा भेटिएकाले सुरुवातमा पहिचान गर्न कठिन भएको प्रहरीले जनाएको छ। पछि हराएका व्यक्तिको विवरणसँग मिलाएर पहिचान पुष्टि गरिएको हो। शवलाई पोष्टमार्टमका लागि कोशी अस्पताल पठाइएको छ। प्रहरीले घटनाबारे थप अनुसन्धान भइरहेको जनाएको छ।
