तेल अभिभ — इरानले इजरायलमाथि गरेको क्षेप्यास्त्र आक्रमणमा परी दुई वृद्ध नागरिकको मृत्यु भएको छ।
इजरायलको आपत्कालीन सेवा प्रदायक संस्था मागेन डेभिड एडम (एमडीए)का अनुसार रामत गान क्षेत्रमा भएको आक्रमणमा करिब ७० वर्ष उमेर समूहका एक पुरुष र एक महिलाको ज्यान गएको हो।
मध्यरातपछि तेल अभिभका विभिन्न स्थानमा खसेका क्षेप्यास्त्रका कारण ठूलो भौतिक क्षति हुनुका साथै मानवीय हताहती भएको पुष्टि भएको छ। एमडीएका महानिर्देशक एली बिनले एक आवासीय भवनमा सिधा क्षेप्यास्त्र प्रहार भएको र दृश्य अत्यन्तै हृदयविदारक रहेको बताएका छन्।
उद्धार टोलीले घटनास्थलमा पुगेर घाइतेहरूको उपचार गरे पनि रामत गानमा ती वृद्ध दम्पतीलाई बचाउन सकेनन्। यस्तै, बनी ब्राक क्षेत्रमा भएको अर्को विस्फोटमा सडकमा व्यापक क्षति पुगेको छ भने उद्धारमा खटिएका एक स्वास्थ्यकर्मीसमेत छर्रा लागेर घाइते भएका छन्।
इजरायली अधिकारीहरूका अनुसार विभिन्न स्थानमा अन्य कैयौँ मानिस घाइते भएका छन्। साथै, धेरै नागरिक बम सेल्टरतर्फ भाग्ने क्रममा त्रसित भई बिरामी परेको जनाइएको छ।
इरानले आफ्ना सुरक्षा प्रमुखको हत्याको बदला लिन थालेको यस सैन्य कारबाहीले इजरायली सर्वसाधारणको जनजीवन त्रसित बनाएको छ।
