इरानका शीर्ष सुरक्षा अधिकारी अली लारिजानी इसराइली हमलामा मारिएको पुष्टि

इरानका शीर्ष सुरक्षा अधिकारी अली लारिजानी इसराइलको आक्रमणमा मारिएको पुष्टि भएको छ। सोमबार राति भएको हमलामा उनी मारिएको इरान र इसराइल दुवै पक्षले जनाएका छन्। लारिजानी इरानको सुरक्षा तथा रणनीति निर्माण गर्ने निकाय सर्वोच्च राष्ट्रिय सुरक्षा परिषद्का प्रमुख थिए र परिषद्ले मंगलबार विज्ञप्ति जारी गर्दै उनको मृत्यु पुष्टि गरेको हो। यसअघि इसराइली रक्षामन्त्री इसराइल कात्जले पनि आक्रमणबाट लारिजानी मारिएको दाबी गरेका थिए। अन्तर्राष्ट्रिय समाचार संस्था रोयटर्सका अनुसार युद्ध सुरु भएयता इरानमा सर्वोच्च नेता आयातोल्लाह अली खामेनीपछि यति उच्च तहका व्यक्तिको हत्या भएको यो पहिलो घटना हो। परिषद्को विज्ञप्तिअनुसार उक्त आक्रमणमा लारिजानीसँगै उनका छोरा र सहायक अलीरेजा बायात पनि मारिएका छन् भने इरानी अर्धसैनिक बल बसिज मिलिसियाका कमान्डर घोलामरेजा सोलेमानी पनि मारिएको बताइएको छ। इसराइलका प्रधानमन्त्री बेन्जामिन नेतन्याहुले थप आक्रमण जारी रहने संकेत दिएका छन्। तीन साताभन्दा बढी समयदेखि जारी अमेरिका–इसराइल र इरानबीचको द्वन्द्व झन् क्षेत्रीय युद्धतर्फ फैलिँदै गएको छ, जहाँ इरानका नयाँ सर्वोच्च नेता मोज्तबा खामेनेईले युद्धविराम प्रस्ताव अस्वीकार गर्दै इसराइल र अमेरिका पछि नहटेसम्म शान्ति सम्भव नरहेको बताएका छन्। यता अमेरिकी राष्ट्रपति डोनाल्ड ट्रम्पले सहयोगी राष्ट्रहरूको कमजोर समर्थनप्रति असन्तुष्टि जनाउँदै नाटो सदस्य राष्ट्रहरू लगायत जापान, अस्ट्रेलिया र दक्षिण कोरियाको भूमिकाप्रति आलोचना गरेका छन्, यद्यपि धेरै पश्चिमी देशहरूले प्रत्यक्ष युद्धमा संलग्न हुन अस्वीकार गरेका छन्। यसैबीच महत्वपूर्ण समुद्री मार्ग स्ट्रेट अफ हर्मुज लगभग बन्दजस्तै हुँदा विश्व तेल आपूर्तिमा गम्भीर असर परेको छ र युद्ध सुरु भएयता तेलको मूल्य करिब ४५ प्रतिशतले बढेको छ, जहाँ इरानले अमेरिका र इसराइलसँग सम्बन्धित ट्यांकरहरूलाई निशाना बनाउने चेतावनी दिएको छ। युरोपेली संघकी विदेश नीति प्रमुख काजा काल्लासले जलडमरूमध्य खुला राख्न कूटनीतिक पहल आवश्यक रहेको बताउँदै स्थिति बिग्रिए खाद्य, मल र ऊर्जामा विश्वव्यापी संकट आउन सक्ने चेतावनी दिएकी छन्। यसैबीच इरानले तेल उत्पादन केन्द्र तथा खाडी क्षेत्रका मुलुकहरूमा आक्रमण तीव्र बनाएको छ भने इसराइलको व्यापारिक केन्द्र तेल अभिभमा इरानी क्षेप्यास्त्र आक्रमण हुँदा कम्तीमा दुई जनाको मृत्यु भएको छ र युद्ध सुरु भएयता इसराइलमा मृतक संख्या १४ पुगेको छ, साथै इरानले क्लस्टर हतियार प्रयोग गरेको दाबी गरिएको छ जसले ठूलो क्षेत्रमा क्षति पुर्‍याउने क्षमता राख्छ र निरन्तर बमबारीका बाबजुद इरानले लामो दूरीसम्म आक्रमण गर्न सक्ने क्षमता देखाएको विश्लेषण गरिएको छ।