काठमाडौँ । वैदेशिक रोजगारीका लागि आकर्षक तलबको प्रलोभन देखाएर क्रोएशिया र अमेरिका पठाइदिन्छु भन्दै रकम ठगी गरेको आरोपमा प्रहरीले तीन जनालाई पक्राउ गरेको छ।
पक्राउ पर्नेहरूमा काठमाडौँ महानगरपालिका–१५ बस्ने, चितवन भरतपुर महानगरपालिका–१५ घर भएकी ४९ वर्षीया कमला देवी सुनुवार, काठमाडौँ बुढानिलकण्ठ नगरपालिका–४ बस्ने सिन्धुली कमलामाई नगरपालिका–७ घर भएकी २९ वर्षीया सविना खड्का र काठमाडौँ टोखा नगरपालिका–११ बस्ने काठमाडौँ दक्षिणकाली नगरपालिका–९ घर भएका ४१ वर्षीय अम्बर गुरुङ रहेका छन्।
प्रहरीका अनुसार कमलाले क्रोएशिया पठाइदिन्छु भन्दै दुई जना पीडितबाट ४ लाख ५० हजार रुपैयाँ, सविनाले अमेरिका पठाइदिन्छु भन्दै एक जनाबाट १ लाख रुपैयाँ र अम्बरले क्रोएशिया पठाइदिन्छु भन्दै एक जनाबाट ५० हजार रुपैयाँ लिएर सम्पर्कविहीन भएको पीडितहरूले उजुरी दिएका थिए।
उक्त उजुरीका आधारमा काठमाडौँ उपत्यका अपराध अनुसन्धान कार्यालय टेकुबाट खटिएको प्रहरीले कमलालाई काठमाडौँ महानगरपालिका–१५ बाट, सविनालाई बुढानिलकण्ठ नगरपालिका–४ बाट बुधबार र अम्बरलाई काठमाडौँ महानगरपालिका–१२ बाट बिहीबार पक्राउ गरेको हो।
प्रहरी प्रधान कार्यालयको केन्द्रीय समाचार कक्षका अनुसार पक्राउ परेका उनीहरूलाई आवश्यक अनुसन्धान तथा कारबाहीका लागि काठमाडौँको ताहाचलस्थित वैदेशिक रोजगार विभागमा पठाइएको छ।
