काठमाडौँ । हिजबुल्लाह ले लेबनान मा जारी द्वन्द्वका क्रममा पूर्वी क्षेत्रमा हेलिकोप्टरमार्फत प्रवेश गरेको इजरायली सेना सँग आफ्ना लडाकुहरू भिडिरहेको जनाएको छ। पछिल्लो इजरायल–हिजबुल्लाह द्वन्द्वमा यो दोस्रो ठूलो भौतिक मुठभेड मानिएको छ।
गत हप्ता इरान समर्थित हिजबुल्लाहले इरानका सर्वोच्च नेता आयातोल्लाह अली खामेनी को अमेरिकी–इजरायली हवाई आक्रमणमा भएको हत्याको बदला भन्दै इजरायलमाथि हमला गरेको थियो। त्यसपछि द्वन्द्व तीव्र बन्दै लेबनानलाई व्यापक क्षेत्रीय तनावतर्फ तानेको छ।
इजरायलले २०२४ को अस्थायी युद्धविरामपछि पनि हिजबुल्लाहलाई लक्षित गर्दै लगातार हवाई आक्रमण जारी राखेको छ र सीमाक्षेत्रमा भूतल सैनिक परिचालन गरेको जनाएको छ। हिजबुल्लाहका अनुसार सिरियाली सीमातर्फबाट करिब १५ वटा इजरायली हेलिकोप्टर पूर्वी लेबनानमा प्रवेश गरेका थिए र आफ्ना लडाकुहरूले उनीहरूमाथि प्रतिकार गरेका छन्।
लेबनानको राष्ट्रिय समाचार एजेन्सीका अनुसार नबी शीट गाउँ नजिक ती हेलिकोप्टर र सैनिकसँग तीव्र मुठभेड भएको थियो। बेका क्षेत्रमा कार्यरत हिजबुल्लाहका दुई अधिकारीले एक इजरायली हेलिकोप्टर खसेको दाबी गरेका छन्।
त्यस्तै, बेइरुत को दक्षिणी उपनगर—हिजबुल्लाहको मुख्य प्रभाव क्षेत्र—मा विस्फोट र धुवाँ देखिएको छ। इजरायली सेनाले त्यहाँ हिजबुल्लाहका पूर्वाधारमाथि आक्रमण गरेको संक्षिप्त बयान जारी गरेको छ। साथै ताइर डेब्बा, ओडाइसेह र ऐटारौन जस्ता सीमावर्ती सहरहरूमा पनि मुठभेड र तोप आक्रमण भएको बताइएको छ।
लेबनानका स्वास्थ्य मन्त्री राकान नासरुद्दिन का अनुसार इजरायली हवाई आक्रमणमा हालसम्म ३९४ जनाको मृत्यु भएको छ, जसमा ८३ बालबालिका र ४२ महिला छन्। इजरायली सेनाले भने दक्षिणी लेबनानमा आफ्ना दुई सैनिक मारिएको पुष्टि गरेको छ, जुन मार्च २ देखि सुरु भएको पछिल्लो अभियानमा पहिलो सैनिक क्षति हो।
