तेहरान – संयुक्त राज्य अमेरिकासम्म प्रहार गर्न सक्ने क्षेप्यास्त्र विकास गरिरहेको भन्ने राष्ट्रपति डोनाल्ड ट्रम्पको दाबीलाई इरानले कडा शब्दमा अस्वीकार गरेको छ। तेहरानले उक्त आरोपलाई ‘ठूलो झुट’ भन्दै आधारहीन प्रचारको रूपमा चित्रित गरेको छ।
इरानको विदेश मन्त्रालयका प्रवक्ता इस्माइल बाकाईले सामाजिक सञ्जाल एक्समार्फत अमेरिकी दाबीलाई “ठूलो झुटको पुनरावृत्ति” भनेका छन्। उनले इरानको आणविक कार्यक्रम, ब्यालेस्टिक मिसाइल विकास तथा जनवरी महिनाको अशान्तिका क्रममा मृत्यु सङ्ख्याबारे अमेरिकाले लगाएका आरोप असत्य भएको दाबी गरे।
यसअघि स्टेट अफ द युनियन सम्बोधनका क्रममा राष्ट्रपति ट्रम्पले इरानले अमेरिकी भूमिसम्म पुग्न सक्ने मिसाइल क्षमताको खोजी गरिरहेको आरोप लगाउँदै तेहरानलाई आणविक हतियार बनाउन कहिल्यै अनुमति नदिने प्रतिबद्धता दोहोर्याएका थिए। उनले इरानी नेतृत्वले “भयावह आणविक महत्त्वाकांक्षा” पछ्याइरहेको आरोप पनि लगाए।
इरानले भने आफूले आणविक हतियार नखोजेको र शान्तिपूर्ण प्रयोजनका लागि मात्र आणविक प्रविधि प्रयोग गर्ने अधिकार रहेको दाबी गर्दै आएको छ। फेब्रुअरीमा अल जजिरासँगको अन्तर्वार्तामा इरानका विदेशमन्त्री अब्बास अराघचीले अमेरिकालाई लक्षित गर्ने मिसाइल क्षमता नरहेको बताए पनि अमेरिकाले आक्रमण गरे मध्यपूर्वमा रहेका अमेरिकी सैन्य अड्डाहरूलाई निशाना बनाउन सक्ने चेतावनी दिएका थिए।
ट्रम्पले डिसेम्बरदेखि सुरु भई जनवरी ८ र ९ मा चरम सीमामा पुगेको विरोध प्रदर्शनका क्रममा इरानी अधिकारीहरूले ३२ हजार मानिसको हत्या गरेको आरोप लगाएका थिए। इरानी पक्षले भने तीन हजारभन्दा बढीको मृत्यु भएको स्वीकार गर्दै हिंसाको कारण “संयुक्त राज्य अमेरिका र इजरायलद्वारा भड्काइएका आतङ्कवादी गतिविधि” रहेको दाबी गरेको छ।
अमेरिकामा आधारित मानव अधिकार कार्यकर्ता समाचार एजेन्सी (एचआरएएनए) ले भने सात हजारभन्दा बढी मृत्यु अभिलेख गरेको जनाएको छ र वास्तविक सङ्ख्या अझै बढी हुन सक्ने चेतावनी दिएको छ।