झारखण्डमा मेडिकल विमान दुर्घटना, सातै जनाको मृत्यु

झारखण्डको चतरा जिल्लामा सोमबार बेलुकी राँचीबाट दिल्लीका लागि बिरामी बोकेर उडेको एयर एम्बुलेन्स दुर्घटना हुँदा सातै जनाको मृत्यु भएको छ। रेडबर्ड एयरवेज प्रालिद्वारा सञ्चालित बीचक्राफ्ट सी–९० (VT-AJV) विमान साँझ ७:११ बजे बिरसा मुण्डा विमानस्थलबाट उडेको र मौसम खराबीका कारण मार्ग परिवर्तनको अनुरोध गरिएको भारतको नागरिक उड्डयन महानिर्देशनालय (डीजीसीए)ले जनाएको छ, तर वाराणसी आसपास पुग्दा कोलकातासँगको सञ्चार र रडार सम्पर्क टुटेको थियो। विमानमा ४१ वर्षीय सञ्जय कुमारसहित उनका सहयोगी विकास गुप्ता, चिकित्सक सचिन कुमार मिश्र, सहयोगी अर्चना देवी र धुरु कुमार तथा क्याप्टेन विवेक विकास भगत र सवराजदीप सिंह सवार रहेका थिए र दुर्घटनामा सबैको मृत्यु भएको Hindustan Timesले उल्लेख गरेको छ। प्रारम्भिक रूपमा खराब मौसम दुर्घटनाको सम्भावित कारण हुनसक्ने बताइए पनि वास्तविक कारणबारे विस्तृत छानबिन सुरु गरिएको छ।