झापामा ओलीको सम्बोधन: आगामी निर्वाचन ‘देश बनाउने र देश जलाउने’ शक्तिबीचको लडाईं

झापा । नेकपा (एमाले)का अध्यक्ष केपी शर्मा ओलीले आगामी निर्वाचनलाई ‘देश बनाउने र देश जलाउने’ शक्तिबीचको लडाइँको रूपमा चित्रण गर्दै झापामा आयोजित चुनावी सभालाई सम्बोधन गरेका छन्। उनले देशको सार्वभौमसत्ता, विकास र समृद्धिका लागि एमालेले जित्नैपर्ने दाबी गर्दै पार्टी ५०–६० वर्षदेखि निरन्तर आन्दोलनमा रहेको र देशको भविष्य यसैसँग सुरक्षित रहेको बताए। निर्वाचन रोक्ने र बिथोल्ने प्रयास भइरहेको आरोप लगाउँदै उनले एमालेको झण्डा जलाउनेजस्ता गतिविधि निर्वाचनविरुद्धको अपराध भएको टिप्पणी गरे। आफ्नो नेतृत्वमा हुलाकी राजमार्ग निर्माण, ज्येष्ठ नागरिक भत्ता ४ हजार पुर्‍याइएको, साक्षरता दर वृद्धि तथा ३९६ आधारभूत अस्पतालको शिलान्यासजस्ता काम भएको उल्लेख गर्दै उनले भ्रष्टाचार नगरेकै कारण आफू निशानामा परेको दाबी गरे। नेपाललाई जात, धर्म र भूगोलका नाममा विभाजन गर्न खोज्ने तत्वविरुद्ध आफू उभिएको र देशको एक इन्च जमिन पनि तलमाथि हुन नदिने उनको भनाइ थियो भने कार्यक्रममा एमाले प्रवेश गरेका युवालाई स्वागत गर्दै पार्टी छोडेकाहरूलाई फर्कन आग्रह गरे।