हालै भएका शृङ्खलाबद्ध आत्मघाती हमलाहरूको जवाफस्वरूप पाकिस्तानले अफगानिस्तानमाथि हवाई आक्रमण गरेको जनाएको छ। पाकिस्तानी सेनाका अनुसार क्याम्प तथा लुक्ने स्थानहरूलाई लक्षित गर्दै कारबाही गरिएको हो।
पाकिस्तानको सूचना तथा प्रसारण मन्त्रालयले आइतबार जारी गरेको विज्ञप्तिअनुसार सूचनाका आधारमा गरिएको लक्षित अपरेसनमा तेहरिक–ए–तालिबान पाकिस्तान (टीटीपी) र त्यसका सहायक समूहसँग सम्बन्धित सात स्थानमा प्रहार गरिएको थियो। साथै, सीमा क्षेत्रमा इस्लामिक स्टेट (आईएस)सँग आबद्ध एक समूह पनि निशानामा परेको मन्त्रालयले जनाएको छ।
अफगानिस्तानको तालिबान सरकारले यस विषयमा तत्काल औपचारिक प्रतिक्रिया दिएको छैन। तर अफगान स्रोतहरूका अनुसार आक्रमण दुई सीमावर्ती प्रान्तमा भएको बताइएको छ। स्रोतका अनुसार पक्तिका प्रान्तमा रहेको एक धार्मिक विद्यालय ड्रोन आक्रमणमा परेको छ भने नंगरहार प्रान्तमा पनि प्रहार भएको रिपोर्ट आएको छ।
पाकिस्तानले हालै इस्लामाबादस्थित शिया मस्जिदमा भएको आत्मघाती विस्फोटका साथै बाजौर र बन्नु जिल्लामा भएका हमलामा अफगान भूमिबाट सञ्चालन भएका लडाकुहरू संलग्न रहेको ठोस प्रमाण आफूसँग रहेको दाबी गरेको छ।
सशस्त्र समूहलाई आफ्नो भूमिबाट आक्रमण गर्न नदिन पटक–पटक आग्रह गर्दा पनि काबुलले ठोस कदम नचालेको आरोप पाकिस्तानले लगाएको छ। साथै, क्षेत्रीय शान्ति र स्थिरताप्रति आफू प्रतिबद्ध रहेको दोहोर्याउँदै पाकिस्तानी नागरिकको सुरक्षा आफ्नो प्रमुख प्राथमिकता रहेको बताइएको छ।
यस घटनाले पाकिस्तान–अफगानिस्तानबीचको सुरक्षा तनाव अझ बढ्ने संकेत विश्लेषकहरूले गरेका छन्।
