रौतहट । जिल्ला प्रशासन कार्यालय रौतहटले निर्वाचनका क्रममा बालबालिकालाई कुनै पनि राजनीतिक तथा चुनावी गतिविधिमा प्रयोग नगर्न आग्रह गरेको छ।
आगामी २०८२ फागुन २१ गते हुने प्रतिनिधि सभा सदस्य निर्वाचनलाई लक्षित गर्दै प्रशासनले सूचना जारी गरी यस्तो निर्देशन दिएको हो।
रौतहटका सहायक प्रमुख जिल्ला अधिकारी जितेन्द्र कुमार यादवले शुक्रबार प्रेस विज्ञप्ति जारी गर्दै बालबालिकालाई राजनीतिक गतिविधिमा संलग्न नगराउन अनुरोध गरेका छन्। विज्ञप्तिमा बालबालिका राष्ट्रका भविष्य भएकाले उनीहरूलाई राजनीतिक प्रभाव, जोखिमपूर्ण गतिविधि तथा मानसिक–शारीरिक शोषणबाट जोगाउनु राज्य, राजनीतिक दल तथा सम्पूर्ण समाजको साझा दायित्व भएको उल्लेख छ।
नेपाल को संविधान, बालअधिकारसम्बन्धी ऐन तथा अन्तर्राष्ट्रिय प्रतिबद्धताअनुसार बालबालिकालाई राजनीतिक गतिविधिमा प्रयोग गर्न नपाइने स्पष्ट व्यवस्था रहेको पनि सूचनामा जनाइएको छ।
निर्वाचन प्रक्रियालाई पूर्ण रूपमा बालमैत्री, मर्यादित र कानुनसम्मत बनाउन सबै राजनीतिक दल, उम्मेदवार, समर्थक तथा सरोकारवालालाई चुनावी सभा, जुलुस, प्रचारप्रसार लगायत कुनै पनि गतिविधिमा बालबालिकालाई प्रयोग नगर्न प्रशासनले आग्रह गरेको छ।
